الاثنين، ٢٤ شوال ١٤٢٨ هـ

امتي تتغير نظرتك للموقف؟!!!!


لما تكون مروح بيتك وتعبان اوي وتقع فجأة يغمي عليك من التعب اكيد ده شئ سئ جدا


بس اكيد لما تلاقي صديق جميل جانبك وقتها قلقان عليك وبيحاول يساعدك...ساعتها هتتغير نظرتك للموقف


لما تقرر في غمرة الضغوط اللي عليك ان تمارس شئ من العبثية في تصرفاتك وان تستعير غباء العالم لتخسر اصدقاء اعزاء ...ده شئ قمئ


بس لما صحابك دول اللي انت راهنت علي طباعهم البشرية وخدت احتياطاتك اللازمة عشان يكرهوك ، طلع عندهم مصطلح في قاموسهم اسمه "تقدير لحظات الضعف الانساني" ويملكون كم مناسب من العقلانية....ساعتها هتتغير نظرتك للموقف


لما تتعرض لشتي انواع القهر وتركلك الاقدام، لا لشئ سوي انك كنت هناك وقتها.. لتقع متأثرا بجراحك ...اكيد ده شئ مش لذيذ


بس لما تبقي في عز جراحك تبتسم وتقوم وتراهن علي ذكاءك -الذي قلما استخدمته-في ادارة الموقف وتنجح في قلب الامر لصالحك...ساعتها هتتغير نظرتك للموقف


لما ترجع بيتك وانت طول النهار في الشغل ويبقي مطلوب منك حجات كتير تعملها وتنضفها في شقتكوا اللي مفيش حد بيساعدك فيها وتشتغل بالاكراه ودون اي مرونة..اكيد ده شئ صعب


بس لما تخلص وتروح تغسل وشك من العرق وتشرب كباية ماية ساقعة...ساعتها هتتغير نظرتك للموقف


لما تصحي الصبح الساعة 5 الفجر بضرب الجزم عشان تجري في الحديقة ادلولية كواجب رياضي اجباري لمحاربة السمنة ..اكيد ده شئ منهك نفسيا جدا


بس اكيد لو وقعت عنيك علي وردة حلوة وانت ماشي او وقفت جنب نخلة قصيرة اوي وفرحت عشان طولك اد طولها ...ساعتها هتتغير نظرتك للموقف


لما يبقي عندك سفر بكرة تبع الشغل وابوك جه لغهولك في اخر لحظة عشان نسيت تعمل حاجة هو طلبها منك ....اكيد ده شئ سخيف


بس اكيد لو استنيت لحد مايصحي الصبح واتحايلت عليه او حاولت تاخد منه الموافقة وهو نايم وتستعبط حبتين...ساعتها هتتغير نظرتك للموقف

هناك ٦ تعليقات:

أحمد حربية يقول...

لما يكون عندك ملل و زهقان و قرفان م الدنيا ....ده شئ مش لذيذ بس لما تدخل علي مدونة اميرة هشام و تقرا التدوينة الذيذة دي و تخرج من حالة الملل...ده شيئ جميل جدا
صباح الفل يا اميرة

عضو الشمال في مدونة ابو سويلم

اميرة هشام يقول...

لما تبقي قاعد ل3 الفجر علي اعصابك مستني الفرج وموافقة السيد الوالد
وتحصل عليها بالتزامن
مع وضع عضو الشمال في مدونة ابو سويلم لكومنته علي تدوينتك

ده معناه انه وشه حلو اوي عليك

وده شئ راااائع اكيد

weswes يقول...

والله يا اميره البوست كله تحفه
بس موضوع انى لما ارجع من الشغل تعبانه واشتغل فى الشقه اجبارى
والله ما بينفع بعدها لا غسيل الوش وكباية الميه الساقه فى تغير ملامح الوش الابلكاش اللى بيبقى عندى
بس ممكن سعتين نوم يوفوا بالغرض
تحياتى

الفراشة الصغيرة يقول...

بجد يا اميرة البوست تحفه
وخصوصا الربط بين
الشغل وتنفيذ الاوامر

بحس انهم ساعات كتير مش بيقدرواان ده شغلك يعنى حياتك وكيانك
ومينفعش انك تلغى حاجة علشان حياتك وكيانك دى ماتبظش
ساعتها بتحسى انك عايزة تنفذلهم اللى فى دماغهم بس تحافظلى على شغلك ونجاحك
وساعاتهابرضوة تحسى بالقهر وانتى بتنفذى طلباتهم
يااااااه كل ده علشان احنا بنات
مش كنا طلعنا صبيان يا ميرو

محمد حمدي يقول...

فعلا بوست جميل ومبتكر فى فكرته .. لكن نوعيه الصحاب والاهل والجناين الى بتطرح ورد دى بقت نادرة اوى اليومين دول فيا بختك بالحاجات دى

Bassaminoff يقول...

لما تقعد تستنى المرتب وتروح تقبض تلاقي الصراف بيقول لك الفلوس مجتش أكيد ده شيئ يشل، بس لما تلاقي حد يسلفك أجرة المكروباص اكيد هتتغير نظرتك للمواقف

تحياتي