الثلاثاء، 12 رجب، 1432 هـ

ازاي كل مرة بلاقي نفسي هنا ؟

ليه كل مرة بلقي نفسي هنا ، ادام نفس العينين نفس العينين اللي كل مببصلهم بيوجعوا قلبي ويسري الالم في الجسد ميوقفوش حاجة ، وتبقي المشكلة اني بعند وافضل باصة واقول مش حاسة بالم الالم اللي اتالمته وانا بستني الالم كان اكتر بكتير عشان كدة الالم اللي بحسه كل مببص في العينين دول مبيبقاش الم

ليه بتبقي كل مرة مصمم تبصلي وتقولي انا عارف انك عارفة بتبصلي بعينك اوي اللي مبقتش اخاف منها وتقولي في تحدي هتقدري تعملي ايه ؟ تحبي نلعب عالمكشوف ؟ في الوقت ده بس بخبي عيني واقلك انا مش عارفة وهفضل كدة مش عارفة

لا مش بهرب انا بس مبحبش احرق عالفاضي زيك تمام خلينا في طريقين متوازيين متعاكسين زي محنا دلوقتي ويوم متحب تغير طريقك و تقطع عليا طريقي تبقي هي دي نقطة الالتقاء ونقطة الصراع في وقت واحد بس لحد متفكر تعمل ده خليك كدة خارج نطاق اهتماماتي ، معنديش وقت ادخل حرب معاك وانتصر عشان تعرف ان انا الاقوي ، ياااه انا نسيت ان احنا اتقابلنا عابرا ومش هنتقابل تاني ، انا مش هشوفك انت تاني بس هرجع اشوف نفس العينين دي تاني

هي هياها نفس العينين العينين اللي لما بتبصلهم بيسري الالم في الجسد ميوقفوش حاجة ، العينين اللي بتبصلك من خلال اشخاص مختلفة وكل شخص بيحاول كل مرة يوصلك انه عارف انك عارف وانت بتحاول توصله انك مش عارف و .....

الاثنين، 11 رجب، 1432 هـ

امي .. الست ماما

بغض النظر عن نهج الحلاليف البرية اللي انا ماشية عليه ..امي مسافرة وهتوحشني ، امي ذلك الكائن الرقيق اللي عنده 4 عيال اعمارهم غريبة ومش متناسقين مع بعض ، يتجلي ابداعها في تربية 4 ابناء ملهمش علاقة ببعض وكل حد فيهم بيتكلم بلغته المختلفة الصحفية والمهندس والطالبة الدحيحة وعمر الطفل الصغير

امي اللي اختارت توقيت الثانوية العامة بتاعتي انا ومحمد عشان تسافر لاداء فريضة الحج ، هي امي بردو اللي اختارت-بعد 8 سنوات تقريبا- امتحانات الماجستير بتاعة محمد اخويا واصعب فترة في حياتي في الشغل عشان تسافر لاداء فريضة العمرة

وهي نفس الام اللي خلتنا نقولها مامي من واحنا في كي جي تو وهو ماتسبب في اقامة حاجز كبير بيننا وبين اقراننا وقتها

وخلت كل الاطفال وقتها يسألوني هو انتي بتقولي مامي وبابي ليه ؟ وانا اقولهم هقول اللي انتوا عايزينه بس اعفوني من اجابة السؤال ده

الازمة مش في سفر مامي ولا كل اللي فات ده

اللي قالقني ان مامي بتختفي وقت الازمات ، يعني مامي لما بتغيب عن البيت ايام بنقعد نحل في الازمات اللي بتحصل في غيابها ده سنين

هتوحشيني ياامي .. هتوحشني ساعة الفجرية والنسكافية اللي بنشربه سوا ، هيوحشني زعيقك لما انشغل علي اللابتوب وتقوليلي منا اللي جبتهولك انا الحق عليا اللي جبتلك اللابتوب اللي خدك مني ده ، هترجعي تلاقيني احسن اكييد ، بترهقيني لما تقوليلي اني نعمة من نعم ربنا عليكي لانك بكلمتك دي بتصادري عليا كل احلامي الشريرة وكل طموحاتي المارقة ، تماهيا مع الموقف الان وعشان مليش في العواطف والمشاعر والكلام دي نسمع الاغنية دي وترجعي

بالسلامة بقي

http://www.youtube.com/watch?v=vwH5KWf9-UU


الأحد، 10 رجب، 1432 هـ

عن البنت اللي مبترضاش تساعد نفسها

البنت الذكية الغبية اللي مبترضاش تساعد نفسها دي صاحبتي

صاحبتي مبترضاش تستقبل مني اي رسايل كل رسايلي ليها متعلقة مش راضية تفهمها

صاحبتي مش بتفهم ليه انا بكره صاحبتها

ومش بتفهم ليه انا بلعن الشر والاذي لما تجيب سيرتها

صاحبتي مش بتفهم صمتي المفاجئ وشرودي

صاحبتي معندهاش خيال مبتعرفش تتخيل ان اقوي ضرر واكبر اذي ممكن يجيلنا من ناس فاكرين ان احنا بنحبهم اوي

صاحبتي مبحبهاش لما تقولي حاضر حاضر حاضر ربنا يكفينا شر حاضر بتاعة تقفيل المواضيع دي

صاحبتي من كتر ما الحقيقة بقت قريبة منها بقت بين عينيها وهي مش عايزة تشوفها

صاحبتي اللي بحبها مبقتش تفهم ليه انا كل مشوفها بتنهد تنهيدة كبيرة اوووووووي وبغمض عينيا

مبرضاش اقلها ان الالم اللي بتيجي الصبح مرسوم علي وشها انا عارفة مين اللي رسمه

انا عارفة مين فنان الالم بس مرضاش اقول عشان وهم انصاف الالهة في حياتنا

لما بيتحطم بيبقي مؤلم اووووي وانا خايفة عليها تموت من الالم

هرتلات مابعد الضهر


السبت، 9 رجب، 1432 هـ

ان تعيش لتروي

ن تعيش لتروي عن البنت اللي لاقت نفسها بتقع فجأة من سابع دور وكان لسة عندها شوية حب قررت تحضن الارض بيهم لما توصلها وبعدين تموت

ان تعيش لتروي عن البنت اللي اتهزمت في عز احساسها بالنصر ..فقررت تضحك عشان من زمان محدش فكر يضحك للهزيمة

ان تعيش لتروي عن البنت اللي الدموع مصممة تخرج من عينيها وهي تقولهم اصبروا في حجات كتير لازم نخلصها قبل منعيط

ان تعيش لتروي عن البنت اللي بتهتم بتوثيق اللحظات اوي عشان كدة استنت في ارض المعركة لحد ميجبولها كاميرا تتصور جنب حيثيات الهزيمة وبردو كانت بتضحك

ان تعيش لتروي عن البنت اللي بتكره الزيف اوي بس كتير مبتستحملش الحقيقة

ان تعيش لتروي عن البنت اللي بتنام في الضلمة وبتحلم بالنور ولما النور يجي هي متبقاش بتشوف "النور رجع بس انا مبقتش اشوف"

ان تعيش لتروي عن البنت اللي عمرها مكسبت في سباق الجري عشان مكانش ينفع تسيب اللي كانوا بيجروا معاها ووقعوا

ان تعيش لتروي عن البنت اللي ماتت بس نسيت تقول وكل الناس يكلموها ويستنوا ترد عليهم وهي متعرفش ترد فيمشوا ويزعلوا

البنت اللي نسيت تقول للناس انها ماتت كل الناس مشيوا وزعلوا منها

ان تعيش لتروي عن البنت اللي ماتت وبقت وحيدة حتي الموتي معرفوش انها معاهم

* ان تعيش لتروي عنوان رواية لماركيز

النور رجع بس انا مبقتش اشوف شعر لاحمد العايدي