السبت، 6 صفر 1428 هـ

وكأنها عاشت لتتذكر

كثيرا ماتواجهها المشاكل والصعوبات
ولكنها تعجز عن صياغتها في كلمات
تتألم في صمت

وترسم علي شفتيها ابتسامة جوفاء
ان جاءتها الشجاعة يوما ان تعبر عما يؤلمها
تنطق باسباب واهية لاشئ فيها من الصحة
تكذب لانها تخجل من اسباب حزنها الحقيقية

الي ان اتي احدهم ووضع يده علي جرحها ومنبع حزنها وضغط بشدة
وتركها تصرخ
وتواجه نفسها بكل جراحها
تتذكر وتتذكر لحظات كتمانها لحزنها
تتذكر كثير من كذبها واجاباتها الساذجة الواهية
وكانها عاشت فقط لتتذكر
____________________________________
مالك متضايقة من ايه؟
اصل المحاضرات عندنا صعبة اوي
متقلقيش ده كله هراء هيخلص علي خير
اه منا عارفة
يظللهم الصمت
بينها وبين نفسها
اصل فرحه وعيد ميلاده كمان يومين والمفروض اقوله مبروك وكل سنة وانت طيب
ياتري هعرف اقول؟
______________________
مالك مكتئبة ليه؟
مفيش انا كويسة
ايه اللي منغص عليكي حياتك؟
مفيش متخانقة مع بابايا شوية وخايفة يموت وهو مش راضي عني واخش النار
ينظر لها بنظرة انتي ساذجة يابت
ترد عليه بنظرة بتقول فيها
اصل حلمت حلم مش حلمي وهبقي اكثر سذاجة مما ابدو لو حكتهولك
___________________________
اتلمي شوية وخدي بالك من نفسك
مالك مش متظبطة ليه؟
مفيش انا كويسة
بتتكلمي بسرعة ليه طيب؟
اصلي خايفة عالرصيد يخلص
طب اقفلي يختي
صمت
ودموعها بتقول اصلي عرفت دلوقتي بس ان مكانش ليا حبيب
كان ليا اب جابني للدنيا وعرفني بيها وانا عندي 17 سنة
______________________________
تتلاقي اعينهم
يتهمها في صمت
ترد عليه ليتني كنت صاحبة هذا الذنب
ليتني كان لي قدرة علي الحب
________________________
-تتذكر امها وهي تقول
انتي اغلي حاجة عندي انتي من نعم ربنا عليا
تحتضنها بقوة وتبكي في حضنها
تستغرب الام وتقولها مالك يبنتي في ايه
تنظر لها وتقول مفيش ياماما اصلي بحبك اوي
تذرف الدموع معاتبة انت ياماما الوحيدة اللي عاملتيني علي اني واحدة كبيرة
ونسيتي تعلميني حجات كتير اوي
_______________------
تتلاقي عيناهم دائما
في كل مرة تلعن الظروف التي جعلته يعلم بامر حبها له
تتمني لو استطاعت ان تشرح له امرها في الحب
تتمني ان تقسم له ان الحب لم يزر قلبها ابدااااا
فالحب والخوف لايجتمعان في قلب واحد
يصرخ قلبها من بين ضلوعها
انها لاتحبك
لم تجعلك تسكنني يوما
ولكنها علمت انك لن تحبها
فاختارتك لتعذبني

لايسمع كل هذا الصراخ
ينظر اليها نظرات يملؤها الشفقة
يحاول ان يتعامل معها باحسن مالديه

ويظل قلبها يصرخ من بين ضلوعها
ولكنه لايسمعه
ويستمر القلب في الصراخ ويستمر هو في الشفقة والتكلف
__________________________________
تتحدث معه
عن طباعهم وشخصياتهم
وتحلل هذا وتنقد ذاك
تستوقفه وتساله وانت شايفني ايه؟
يجاوبها باحتراس
مازلت تحاولين اكتشاف ذاتك
لم تكتمل صورة شخصيتك بعد
تصمت وتدرك انها برغم بلوغها هذا العمر.... لسة جاية الدنيا جديد.... ولسة بتتكون
__________________________________
انا خلاص هتخطب
تقولها وتبتسم
يباركون لها جميعا
اما هو فياتي ليزيح عنها قناع السعادة المزيف الذي تضعه علي وجهها
ويقول
بصراحة ومن غير زعل
انا مبعتبركيش اكتر من طفلة او واحد صاحبي
مش قادر اتخيلك عروسة
هو انتي تعرفي الجنس اصلا؟
كان اسلوبه مستفزا مؤلما
اخذت تسخر منها معه
يضحك وتضحك
ثم فجأة تبكي
وترجوه ان يكف
يعتذر لها
تقبل اعتذاره بابتسامتها الجوفاء المعهودة
ثم تستأذنه وتذهب الي غرفتها
تجلس وهي تضم ركبتيها الي صدرهافي الظلام
ويرن صوته في اذنها
عايزك تكسري حاجز الخوف والخجل اللي جواكي
مكانش قصدي اجرحك
تصرخ فيخترق صراخها السكون من حولها
ثم تصمت
تصمت للابد

الأربعاء، 26 محرم 1428 هـ

لحن لم يكتمل

بالرغم انها قصة لم تكتمل
تحاول ان تجد لها بداية ونهاية ولكنها دائما ماتفشل
الا انها تعتز بها فهي تجسد قصة حبها

انظر الي السطور لاجد فتاة لاتعترف بوجود المشاعر في حياتها
تضمن لنفسها النجاح دائما
ولم لا؟
وقد خلعت قلبها من مكمنه لتضع بدلا منه صخرة
تمشي مطمئنة
تصب لعناتها علي البشر ولا تأبه سوي بذاتها فقط
تمثل القوة علي البشر جميعا حتي لايكتشف احدهم انها اضعف كائن في الوجود
نعم فلقد كانت مريضة
لم يعلم احد بحقيقة مرضها فهي تكره شفقة البشر

الاثنين، 24 محرم 1428 هـ

عارفة انكوا زعلانين مني

او حاسين اني متغيرة

بس كل اللي اقدر اقوله

اني محاولتش اغير نفسي
علي اد منفسي تعبتني وطلعت عيني محاولتش اغيرها

ولو كنت اتغيرت دلوقتي
الظروف هي اللي غيرتني

الفترة الاخيرة اتعرضت لمشاكل كتيييييييييير
شايفة من الهراء اني اقعد احكلكوا عنها واضيع وقتي في حجات ملهاش لازمة


جايز تكون الدنيا غيرت مني شوية
بس لسة مطالتش قلبي ولا اللي ساكنين فيه
استحملوا وحدتي اللي بقيت احب اعيش فيها حتي وانا معاكوا
استحملوا اميرة زي ماهيا

لاني اتعودت ابقي معاكوا بطبيعتي
حتي لو كانت الطبيعة دي اسوا مايكون

السبت، 15 محرم 1428 هـ

إلي صديقي ...الذي كان

هكذا تجد نفسك في مفترق طرق
تقابل بشر تعتبرهم اصدقائك
لتكشف الايام عن الحقيقة
هم اشخاص جيدة
ولكنهم لايعتبروك صديقا
يتجاهلوك تحت شعار الظروف الصعبة

لاتملك شيئا سوي ان تفتح باب عالمك
وتنظر لهم بابتسامة تخفي الف دمعة
وتخبرهم بامكانية خروجهم من عالمك سالمين
ينظرون إليك في تردد و خجل
ويحسموا الامر ويتجهوا الي الباب مغادرين


تعصف بذهنك آلاف الذكريات الحلوة والمرة
تعتقد انه حان الوقت لموتها
تحتار في كيفية موتها
اتموت علي شفتيك عندما تذكرها
ام تموت عندما يكتبها قلمك
تقرر ان تذبحها علي مقصلة الكتابة
تكتبها في عجل
تجمع شتاتها من الزمان
تحتار لمن تهديها
بعد تردد
تجد دموعك وقد ارتسمت عالورقة
لتكون الاهداء
-إلي صديقي ....الذي كان-

....................................................................................................

شكرا دايما رافعة من معنوياتي


هههههههههه وهفضل ارفع فيها كدة علطول

بيني وبين نفسي هو بيشكرني علي ايه بس?!
_____________________________
يحكي لي شيئا هاما

اتظاهر بالتشاغل بالرغم من تركيزي الشديد في حديثه

هو بنرفزة :لما بيبقي في حد من صحابي مش عايز يسمعني بيقولي فكك من الكلام ده وخلينا نتكلم في حاجة تانية
انا مقصدكيش انا بقولك عامة ،

اضحك في سري واقول حاضر
____________________________
عيبك انك مش فهماني
مش قادرة تفهميني

انا باستفزاز:عمري محاولت افهمك،الناس بيبقوا احلي كتير لما منبقاش فاهمينهم

بيني وبين نفسي
مشكلتي اني فاهماك كويس اوي، بس ساعات بنبقي فاهمين اللي ادامنا ومش بنعرف نعامله علي حسب فهمنا ليه
عشان كدة الاحسن ان احنا نقول ان احنا مش عارفين نفهمه
_____________________________
يلهوي ده دايخ وتعبان
اعمل ايه بس؟

يبدو الطريق لي طويلا وهو يمشي وانا امشي بجانبه اخاف ان يقع في اي لحظة ويغمي عليه
نصل الي رصيف المترو
ونجلس
ارتاح قليلا
واراه قد تحسنت حالته

يبنتي قومي روحي عشان محدش يزعقلك انك اتاخرتي

لا ده لسة بدري وبعدين مش هينفع اسيبك لوحدك كدة

منا طول عمري لوحدي

ماليش دعوة مش هينفع اسيبك

تحكي عن حبيبتك فاسمعك بانصات
ابتسم في وجهك ،افرح من اجل مشاعرك الجميلة
انهار خوفا عليك من خيبة الامل
اتضرع الي الله ان يوفقك في حبك هذا

اراك تقطع حديثك فجأة لتصر ان ارحل حتي لااتأخر
استجيب لطلبك
اؤكد عليك
خلي بالك من نفسك
لما توصل رنلي
ماعييش رنات
خلاص هرنلك وانت تكنسلني
_________________________
اجلس امامك في موقف مهيب

افكر ماذا ساقول لك؟
وكاني امام محكمة متهمة بانتهاك كثير من الحقوق ولا ادري كيف ادافع عن نفسي

تري هل ستصدقني؟
املي الوحيد ان تصدقني

مااصعب هذا الموقف
ياالله برحمتك استغيث

اتحدث بصعوبة شديدة
يخرج كلامي مجمعا كلمة من الشرق مع كلمة من الغرب

المح في عينيك الدموع علي حالي هذا وعلي موقفي امامك

تستحلفني بالله ان اصمت
اصمم انا علي تكملة الكلام

يتبقي لي ان ابرر مشاعري

اراك تنهرني بقوة حتي لااقول شيئا

بيني وبين نفسي اشكر لك كرم اخلاقك

وبهذا ينتهي الموقف
____________________________
اراني بعد هذا الموقف اعاملك بتحفظ شديد
احاول ان اتخانق معك لاتفه الاسباب

اراني افكر في الحرف الواحد قبل ان اقوله

تأتي انت لتخرجني من هذه الحالة

تقولي تعرفي اني معزتك عندي من معزة اختي،يمكن كمان بحب اتكلم معاكي اكتر من اختي
وبحب كتابتك اوي

بيني وبين نفسي
ياه علي جمالك،بتحاول تداوي الموقف بحكمة
ارد عليك في براءة متسائلة بجد؟
تقولي اه والله

يأخذنا الكلام
اول مرة من ساعة معرفتك
اتعامل بطبيعتي معاك
اطلب منك ان تكتب لي كلام للذكري
اهزر معك واضحك والعب
___________________________________
ايه رايك تيجي نتفق علي اتفاق؟
انا هطلب منك 3 طلبات لو نفذتهم
ليك عندي طلب واحد انفذهولك مهما كان طلبك ده
بيني وبين نفسي
-طبعا هيستهتر بكلامي وهياخدني علي اد عقلي كالعادة-
هو بشئ من اللامبالاة: قولي طيب

ارد عليه بعد شئ من التفكير
انك تحب نفسك

وانك كذا
وانك كذا
هو بعد تفكير خلاص اتفقنا
بيني وبين نفسي
انا عارفاه ولاهينفذ حاجة بس ادينا بنحاول
اترقب في صمت
________________________
بعد وقت غير قليل
انا اتغيرت بجد
دي مش خطوة لادام دي نطة في حياتي
انظر اليه غير مصدقة
ولكني اسعد فقد نجحت في التغيير فيه بعض الشئ

يكمل الحديث الذي استمتع بالاستماع اليه
وبعدين يقولي
انا نويت ماارتبطش دلوقتي
اضحك في سري وارد عليه ببرود
طيب كويس
بيني وبين نفسي
والله يبني خايفة عليك من كتر مانت عاوز ترتبط ومن كتر مانت بتدور عالحب تختار غلط
__________________________________
انا مالاقيتش الطلب اللي انت طلبته مني

خلاص يبنتي كبري دماغك
انا بغيظ:حاضر هكبر دماغي

اذهب لابحث في كل مكان واقسم بالله ان اجد هذا الطلب مهما حدث
فهذه بنود اتفاق ويجب ان افي بعهدي معه

تنتابني فرحة عارمة عندما اجد مااريد
_______________________
معلش بجد انا آسف

الظروف والله

ولايهمك مقدرة ظروفك
في ميل كتبتهولك بعاتبك فيه وقلت كلام كتير عنيف متبقاش تقراه

بيني وبين نفسي
اصله خلاص مبقاش ينفع بينا عتاب
ولااعذار

ولاظروف هتبقي اكتر من ظروفي في اليوم ده

_________________________________

الجمعة، 14 محرم 1428 هـ

اول مرة تعجز حروفي عن التعبير

يمكن عشان هكتب عنك

طب منا كتبت عنك كتير قبل كدة

كتبت عنك قبل مشوفك

وكتبت عنك لما حبيتك

وكتبت عنك لما وقفت جانبي

وكتبت عنك لما جرحتني

بس المرة دي هكتب عنك بعد معرفتك

تعرف ان اجمل حاجة لما نعيش مع الناس منغير منعرفهم

من غير منفهمهم

بنبقي مبسوطين اوي بيهم

فرحانين بشوية لحظات ومواقف وايام واحداث وهمية بيصنعوها معانا

هتوحشيني ياجميلة




مبروك ياطمطم