الأحد، 9 محرم 1428 هـ

ويشب في قلبي حريق ....ويضيع من قدمي الطريق


هأنت قد دخلت عالمي الخاص


لعبت الصدفة دور كبير في هذا الحدث الأليم


قد تندهش عندما تعرف من هي اميرة

من خلال هذه الاوراق


نعم انها انا

انا في عالمي الخاص

بين خواطري مذكراتي ومشاعري وخيالي


لااملك لك اعتذارا


انت من اقتحمت عالمي


هل لي ان ابرر لك مشاعري


لقد كنت لك كما اردت

تلك الفتاة التي تحافظ عليك وعلي اسمك وتراك في كل تصرفاتها

تعرف عنها كل شئ في حياتها اليومية


ولكن هل كان من حقك ان تعرف مايدور بخلدها


هل من حقك ان تعاقبها علي شئ لاتملكه


هل من حقك ان تعاقبها علي نبض قلبها


ياعزيزي لا تحزن


فلتكمل قراءة تلك الاوراق


لتدرك مأساتي


لتعرف اني امراة استعذبت العذاب


اشفق عليك واراك بعين الخيال تبكيني


اكمل قراءتها


فستبكيني وتبكيني وتبكيني


اقرأها لتنهار صورة الفتاة القوية التي لاتقهرها الظروف امامك


اقراها لتعلم ماذا كنت اكتب عنك ولتعلم مقدار حبي لك


اقرا كل السطور

لاتترك سطرا واحدا


ستعرفني جيدا

ستفهمني

فانا كتبت في تلك الاوراق كما لم اكتب من قبل

لن اتهمك بانتهاك خصوصياتي

قد التمس لك العذر

فلقد وجدت تلك الاوراق امامك

وقرأت منها سطر واعلم تلك السطور كم هي مشوقة

تنهار امامها كل الحدود

لاادري اين وصلت في تلك السطور

اراك تملكك الخوف علي تلك الفتاة الصغيرة

لاتخف

انه عالم علي الورق فقط ...من صنع خيالي

فلتستمر في القراءة

وعندما تنتهي من قراءة تلك الاوراق اكون انا انتهيت

الخميس، 6 محرم 1428 هـ

كراسة الخواطر

وبعدين هنعمل ايه؟
البنت عندها 11 سنة وبتحب

انا من رايي ان احنا نحترم خصوصياتها يااحمد والمفروض مكناش نفتح كراسة خواطرها

انتي بتقولي ايه ، انا هربيها

______________
الكلام ده دار بين ابويا وامي لما قروا اول خاطرة ليا
وكانوا منزعجين جداااا
انا طبعا سمعتهم بالصدفة لما كنت بلمع الاكر ولقيت سيرتي جاية في
....درافت لم يكتمل لسبب لم اعرفه

الثلاثاء، 4 محرم 1428 هـ

بدون عنوان


كان حلما او سرابا فانقضي
كان قلبا عاشقا فقضي الحب فيه ماارتضي

هذا مااستطعت ان اقول عن كل ماولي من عمري وفات

H.M.A

الأربعاء، 27 ذو الحجة 1427 هـ

صورة مع كوم زبالة ....كوميدية سوداوية


قبل أن تشار إلي أصابع الاتهام بقراءة الصحف القومية
أحب أقلكم أنا بريئة
ولكنها الصدفة البحتة التي جعلت عيناي تقع علي هذا الخبر في جريدة الاهرام
والذي يتحدث عن سياح انشغلوا بأخذ الصور التذكارية بجانب كوم زبالة
انا بعد ماقريت الخبر اطمنت علي مستقبل مصر
كدة السياح هيروحوا بلدهم ويرجعولنا السنة الجاية بناس كتير اوي
عشان يتصوروا جنب زبالتنا والتي اعتبرها السياح الالمان من آثار مصر الحديثة


وإليكم جزء من الخبر الذي لم اتحمل نقل كل تفاصيله التي تجعلك تضحك وتضحك وتضحك لتكتشف مدي الوضع المؤلم فتبكي


في أول شارع الهرم تعطلت فجأة احدي سيارات السياحة التي كانت تقل فوجا من السياح الالمان تحديدا واثناء انشغال السائق والمرشد السياحي باصلاح العطل قبل التوجه لزيارة الاهرام نزل السياح إلي الرصيف

فلمحوا كوما كبيرا من القمامة

الغريب أن السياح راحوا يتسابقون لاخذ صور تذكارية مع اكوام القمامة



الثلاثاء، 26 ذو الحجة 1427 هـ

عندما ارتديت ثوب الصمت لحظات

يابنتي انتي لسان وطلعله بني ادم

انتي مفيكيش غير لسانك

انتي مبتتعبيش من الكلام افصلي شوية دي التلاجة بتفصل

هكذا تذكرت اقوالهم المأثورة التي يقولونها لي كلما رأوني

وتمنيت الصمت

ولكن كيف لي بالصمت وانا لساني لايكف عن العمل ليلا نهارا

كنت اتذكر اصدقائي الصموتين واراني بعين الخيال وقد تبادلت معهم الادوار علي مسرح الحياة

فاجدني انا الصامتة وهم يجلسون امامي ليحدثوني بالساعات

وبينما انا احلم واتخيل

جاءني الزمان

ودار بيننا هذا الحوار

لماذا تتمنين الصمت
فالحياة هي الكلام والتفاعل مع البشر وتبادل الاراء والافكار

وحتما ستصبحي من الصامتين عند الموت

ولكني ايها الزمان لا اقصد الصمت الابدي
اقصد لحظات من الصمت

فلقد تحدثت كثيرا كثيرا حتي قاربت علي النفاذ

هل لك ان تحقق امنيتي وتعطيني لحظات احيا فيها صامتة

اجابني الزمان بعد تفكير
حسنا ساحقق لك امنيتك

اراني وقد تهللت اساريري
فالفرصة قد سنحت لي لآخذ دور آخر علي مسرح الحياة

ساحيا الصامتة للحظات بدلا من الثرثارة التي لاتطيق لحظة صمت

ارتديت ثوب الصمت في عجالة احاول ان استمتع بكل لحظة ارتديه فيها

اعلم تماما ان الزمان عائد مرة اخري ليأخذه مني

فلا أحد يستطيع أن يمتلك ثوب الصمت للابد

فقط نعيش داخله للحظات

الاثنين، 25 ذو الحجة 1427 هـ

لو بطلنا نحلم نموت




دي اختي توتو ،امبارح دخلت عليها الاودة لقتها نايمة بالشكل اللي انتوا شايفينه ده

طبعا اي حد يفتكر انها كانت ياعيني بتذاكر-عشان صابح عليها امتخان- وراحت عليها نومة

انا كنت فاكرة زيكوا كدة

بس لما قربت لاقيت انها نايمة وهي ماسكة قلم وبتشخبط في كراسة

تعرفوا وقتها تخيلت إيه؟

تخيلت انها بتحلم وبترسم بقلمها الاحلام دي عالورقة

جايز تبان ليا شخابيط بس اكيد عندها هي ليها معني كبير اوي

تعرفوا إن أجمل حاجة في الدنيا هي الحلم

كل واحد فينا عنده حلم

بيبقي عايش عشان حلمه ده وبيحاول يحققه

جايز يكون حلم بسيط وجايز يكون حلمه كبييييير ومحتاج منه صبر

بس في الآخر لازم نحلم

و علي رأي محمد منير لو بطلنا نحلم نموت

احلموا فقد يكون الحلم هو الهواء النقي في هذا الجو الفاسد

قد يكون سفينتكم للعبور لبر الأمان

احلموا حتي لو بان حلمكوا للناس شخابيط مالهاش معني

هو عندكوا أكيد معناه غالي

الجمعة، 22 ذو الحجة 1427 هـ

بنيجي عالهايفة ونتصدر


ربنا كرمنا السنة اللي فاتت

وتفضلت احدي زميلانا بالدفعة

بعمل جروب انترنتي للدفعة بتاعتنا

عشان نتواصل علي درجة اعلي

ونسال بعض في الحجات اللي احنا مش عارفنها

لحد هنا وتمام وزي الفل


نيجي وقت الامتحانات بقي

الجروب بيبقي في قمة النشاط

والرسايل رايحة جاية


بس في رسايل بقي ممكن تجبلك الضغط

وامراض الدنيا كلها

لما تبقي صابح عندك امتحان

وتلاقي ناس باعتة تسال هي الصفحة دي في المنهج ولالا

؟!

اذاكر من المحاضرات ولا الكتاب؟!

واحلي حاجة بقي لما تاتي الاجابات بين مؤيد ومعارض

وتتكون احزاب

ويسالوا علي دفعة رابعة اعلام

يلاقوهم بدل ماقاعدين بيزاكروا

محتارين ويشجبوا ويعترضوا

هي الصفحة دي علينا ولا لا

او هي المزاكرة من المحاضرات ولا الكتاب


طبعا الحجات دي كانت بتجيبلي الضغط وتخليني عايزة اولع في نفسي

بس كنت اعمل ايه؟

كنت ارقب في صمت واعترض في صمت


دي اخر سنة لينا بقي وعايزينها تبقي حسن الختام


لحد ماعبر احد زملائي عما يجول في صدري

وكتب الآتي

أعلنت مصادر رسميه وجهات إعلامية عالمية منها هيئة الإذاعة البريطانية بي

بي سي ، سي إن إن الأمريكية اهتمامها الشديد بقضية تغييب الرأي العام من طلاب الفرقة الرابعة بقسم الإعلام وعدم معرفتهم معلومات دقيقة حول ماهية المقرر من الفصل الثامن مما قد يؤدي بنتائج غير محمودة قد تحدث أثناء الامتحان ، هذا وقد دعت حركة كفاية الطلاب لإضراب عام أثناء الامتحان وعدم الاجابه على أي سؤال يتضمن الفصل محل الأزمة في الوقت نفسه أعلنت مصادر من قسم الإعلام للمتحدث الرسمي للقسم "كريم" أن هناك جهود تبذل للاتصال بالدكتور عصام فرج , وسوف يتم التوصل لصيغه محايدة ترضي الجميع لمنع الاقتتال الداخلي أو أي محاوله لفرض حلول من الخارج نظرا للوضع الحساس لهذا الفصل والاعتقاد بوجود تمويل أجنبي وراء وضعه في المنهج ، يذكر أن الجامعة العربية أعلنت بدورها في إعلان رسمي " أنها تخشى إن تدب الفتنه في صفوف الأشقاء ، ولابد من التدخل السريع لتدارك الأزمة ودعت قوى 14 جيمي ، وقوى 11 العلم الاجتماع على طاولة الحوار لبحث مبادرة الجامعة لتكون ص 143 هي المقررة ونقسم البلد نصفين " هذا ولم ترد إلينا أي تعليقات من الأخوات اقصد الأخوة الرؤساء العرب في انتظار وصول السيدة كوندليزا لعرض المشكلة عليها . أعذروني قد أبدو سخيفا خاصة في مثل هذا الوقت – قبل الامتحان بيومين – لكن أردت فقط أن أقول لكم إننا نتحمس لقضية ممكن تعدي لكن لا نكلف أنفسنا حتى أن نعرف مجرد المعرفة أحوال إخواننا في كل مكان :وقت أن كنا نناقش المقرر من الفصل الثامن كانت أمريكا تقتل 550 صومالي بقصف جوي وصومال لمن لا يعرف هي بلد عربي مسلم ، كانت أمريكا تقتل مدنيين في العراق , وكانت إسرائيل تقتل 35 بريئا في عمليه بغزه ، كانت أمريكا وإسرائيل يدبان الفتنه بين الأشقاء في لبنان وفلسطين .......... بل هل نعرف شيئا عن التعديلات الدستورية التي تجري في بلدنا . لماذا يشغلنا الحقير عن الكبير لماذا لا يكلف منا احد نفسه أن يعرض هذه القضايا للمناقشة على المنتدى في الأجازة بل هل يكلف منا احد نفسه ليدخل للمنتدى أصلا إلا في الامتحانات ؟ الاجابه واضحة من بين ثنايا بيت الشاعر :
وطن تكدّس في العراء وفي جوازات السفر وفؤادك الناري قدّيس توضأ بالنجوم على مرايا .. من حجر ..!
هذا ما أردت أن اذكر به نفسي أولا ثم زملائي

محمد معوض


قد يظهر بعض افراد دفعتي الغضب والاستياء او حتي السخرية في افضل الاحوال


قد تأتي هذه الاقوال علي لسانهم:_

ياعم هو ده وقتك

احنا ناقصين

احنا عايزين ننجح


بس انا شايفة انك بتتكلم صح وقد عبرت عما يجول بصدري


تحية وشكر لك

الأربعاء، 20 ذو الحجة 1427 هـ

راحل وسأعود عندما أستحق الحياة وسطهم





إلي نفسي ....التي أرادت يوما الرحيل


إلي نفسي.... التي كنت اعدمها كل يوم


عقابا لها علي ذنوب ارتكبتها ولم ترتكبها


إلي نفسي التي كانت تعتذر في كل لحظة علي اي شئ وكل شئ


توقفي عن هذا الهراء


فقد اعطاك الله الحياة لانك تستحقيها


لم يعطها اياكي لتقرري الرحيل او لتبقي لتمارسي طقوس التعذيب عليكي

________________________________________________


هكذا تصاب بحمي السذاجة والغباء


تستيقظ لتجد نفسك قد هدمت عالمك وخسرت أصدقائك
خسرت أشياء تعلمها وأشياء لاتعلمها
لاتدري ماذا تفعل وقد أصبحت خطواتك مضطربة


مع كل خطوة ينهدم شئ فيك أو في طريقك
انتهت الحياة في نظرك
تحاول الانتحار

تشاء الاقدار ان تفشل
لتعود وتبكي فحتي الانتحار كان فصل آخر من فصول حياتك التي كان دورك فيها انسانا مغيبا وساذجا وغبي
تظل تحمل نفسك فوق طاقتها
وتحاسبها وتعنفها وتمارس كل انواع العنف تجاهها
حتي تدميها
تري جراحها فلا تعبأ بها

وتستمر في عنفك تجاهها
تعترف بأنك فشلت في الرحيل الابدي

ولكنك قد تنجح في الرحيل عن عالمهم -هؤلاء الناس الذين عشت وسطهم واحبتهم من كل قلبك


تقرر ان ترحل وتعود عندما تستحق الحياة وسطهم

ترحل فقد تستطيع اصلاح نفسك
قد تستطيع شفائها من سذاجتها المعهودة
لتعود وتتعامل معهم ومع الدنيا كلها بروح اجمل واقوي


هأنت نويت الرحيل لتعاقب نفسك علي اخطاءها

ولكن قبل ان ترحل

هل لي ان اسالك عن عالمك واصدقائك
هل عالمك هو المدينة الفاضلة واصدقائك هم الملائكة؟
إن أصدقائك هم بشر يعيشون في عالم تندر فيه الأشياء الجميلة

هل الخطأوالخطيئة مفاهيم اندثرت في قاموس عالمك

وقد تشرفت يداك بوضعها فيه من جديد؟

ياعزيزي إنهما موجودان منذ بدء الخليقة
تتحدث عن السذاجة والغباء واشياء كثيرة من هذا القبيل
ومن منا لايصاب بهذه اللحظات؟
من منا يملك ان تكون حياته خطا مستقيما لاتنحرف خطواته عنه ابدا؟

قد تكون تسببت في الم احد اصدقائك او جرحتهم

معك انه شئ سئ
فلتندم عليه وتتذكره حتي تتعلم منه
الاخطاء خلقت لنتعلم منها
وليس لنبكي عمرنا كله علي تبعاتها
ومااكثر المخطئين في عالمنا هذا
امازلت مصمم عن الرحيل؟
أترحل عن أصدقاءك ... عالمك ... كيانك
لا
لن ترحل


ستبقي معهم

لاتفتح صحفة جديدة مع من اخطئت في حقهم
فقط حاول ان تمحو الاشياء القبيحة في الصفحة القديمة

اراها فيها كثير من الاشياء الجميلة
لاتطويها
بالله عليك لاتطويها
ان ارادوا الرحيل
فلتفتح لهم هذه الصفحة وتريهم الاشياء الجميلة
اري انها كفيلة
كفيلة بان تمحو الاثام والاخطاء
وإن لم تفلح تلك الاشياء الجميلة في محوها
فاتركهم يرحلون عن عالمك
اتركهم ولتبقي الذكري شاهد أبدي علي تلك الاشياء الجميلة


وأنظر إلي طريقك من جديد واحسب خطواتك فيه حتي لاتتعثر مرة اخري


ولتعلم أين انت ذاهب ؟


وتناسي من اي طريق اتيت؟


الجمعة، 15 ذو الحجة 1427 هـ

انا خلاص مش عايزة اكلم حد

انا واقفة علي خشبة مسرح الحياة ومعايا ناس كتير اوي
كل واحد فينا المفروض ليه دور
لحد كدة طبيعي
كل واحد بيعمل دوره عشان الاحداث تتحرك وتمشي

بس ساعات الاحداث بيتبقي جامدة وثابتة
مش بتتحرك خالص وانا مش بحب كدة

كنت بحاول احركها

وكنت بحركها واخليها دايما ماشية

في مرة جربت اسكت ومتكلمش مع الناس حواليا علي المسرح

لقيت الاحداث ثبتت عندي انا بس
ولما سكت وبطلت اكلمهم
محدش فيهم كلمني

وانا كمان خلاص مش عايزة اكلم حد

الأمل ،الحب،الحلم .....أوهام قد تصنعنا

كلنا بنحلم
وبنحب
وبنعيش بالامل

بس لو في يوم حبنا كان سراب
او حلمنا محال
او عندنا امل في لاشئ

هنبقي بنعيش الوهم

معرفش ليه ناس كتير بتخاف تعيش الوهم
مع ان ممكن الوهم يصنع انسان

يعني لو واحد مثلا حب اوي وعمل كل حاجة حلوة عشان خاطر اللي بيحبه
وعشان خاطر يستاهل اللي بيحبه

طلع في الاخر مفيش حب ولا حاجة
مش هيبقي كسب نفسه وكسب الحجات اللي عملها؟
درافت لم يكتمل لاسباب لم اعرفها بعد

الأربعاء، 13 ذو الحجة 1427 هـ

اول بوست ليا في السنة الجديدة

مش عارفة اكتب ايه
المفروض ده اول بوست ليا في السنة الجديدة
السنة دي كانت زحمة اوييييييي
مرت عليا احداث كتير وعرفت ناس كتير
مش عارفة ابتدي بالاحداث ولا الناس
ولاعارفة اكتب ايه في البوست ده
انا هكتب اللي يجي علي دماغي وخلاص
الناس اللي عرفتهم السنة دي في حياتي في ناس منهم بجد والله كانت حياتي هتبقي صعبة من غيرهم اوي
علا سالم: بالرغم من ان عمر معرفتنا صغير اوي الااني حسيت اني اعرفك من زمان،سامحيني لو كنت خفت عليك اكتر من اللازم في يوم من الايام

اثير:عشرة عمر اه بس عمرنا ماتفقنا،دايما كنت سيئة الظن بيك في كل حاجة،لما جيت وسالتك في مرة عن تصميم المواقع لما كنت عايزة اعمل انا وصحابي موقع فكرته الرئيسية الفضفضة ونصحتني بالبلوج او عمل مدونة افتكرتك وقتها بتوزعني ومش عايز تساعدني
معلش انا معرفتش انك انسان غير السنة دي بس ومعرفتش ان ممكن يكون في بينا نقطة التقاء فكري وانساني غير السنة دي بس

احمد ندا :اول مرة شفتك اتخنقت منك بصراحة،كنت بسمع عنك من موقع جمانة
شفتك في يوم التجمع التاريخي بتاعنا في الحديقة الدولية
فانت جاي من بعيد وقالولي ان ده احمدندا رحت عشان اسلم عليك
ازيك يااحمد عامل ايه علي فكرة انت خلتني اكتب حاجة حلوة اوي عن النقد
وانت وقتها في عينيك نظرة بتقول مين دي انا فين انا ليه
قام بسام وبربارة بتدارك الامر دي بوسي اميرة
رديت باستغراب ودهشة السلام
المهم يبني اني وقتها قفلت معايا وقلت استحالة هيبقي في بيني وبينك عمار
مكنتش اعرف وقتها انك واد جدع اوي اوي اوي

محمود عبدالرحمن:انامش بحب اسم محمود خاااالص ويمكن تقبلت الاسم بس عشان هو اسمك
عشان كدة انا دايما بناديك عبدالرحمن،انت انسان جميل اوي ياعبدالرحمن وياريت تتخلي عن صمتك شوية وتتكلم عشان الناس تعرف اد ايه انت جميل من جواك،انا فاكرة اول مرة شفتك مكنتش اعرف خالص انك معانا في الكلية وتاني مرة يوم اخر امتحان ليكوا لما اتكلمنا مع بعض بجد كاني اعرفك من عشرين سنة

ايهاب الدسوقي:احنا متكلمناش مع بعض كتير جايز بس ليك معزة خاصة عندي
ولا يمكن هنسي موقفك لما كنا في الجامعة وناس اتخانقوا معايا عشان بصور في المظاهرة وانت كنت هتيجي معايا عشان اصور الصور اللي انا عايزاها

محمد علي الدين:كنت رفيقي في خطواتي الاولي في الحياة العملية ولك مواقف معي لاتنسي


بسام عبدالسلام-بسامينوف-اكتر حد سمعني في الشهور الاخيرة من السنة
كنت تجعلني احلم بالمستحيل واتحدث عنه وكانه ملك يداي


هشام علام:انا اعرفك من زمان ،مش فاكرة من امتي ياهشام
بس انا حاسة اني معرفتكش غير السنة دي
علمتني ان الحياة مغامرة تستحق المقامرة

دعاء عادل:انسانة بجد ومشاعر رقيقة ،يمكن ده اللي قدرت اعرفه عنك من معرفتي البسيطة اوي بيكي

حنان الجوهري:بنت بلد وبت جدعة بجد وبرده ده اللي عرفته عنك من معرفتي البسيطة اوي بيكي

دعاء ومها واحمدابراهيم -اصحاب علا- ناس معتقدش اني هندم في يوم من الايام اني عرفتهم

حسين الجارحي ومحمد علي:جمعتنا فكرة واحدة جايز فشلنا في تنفيذها او الظروف بعدتنا عن تنفيذها
بس كسبت معرفة قلوب طيبة وولاد بلد زيكوا

الناس بقي اللي اعرفهم بقالي زمن واكتشفتهم السنة دي بس

احمد الدريني: كنت دائما الغائب الحاضر في حياتي،عقدتني بجد لاني كان نفسي يبقي عندي نص الانسانية والصفاء والنقاء اللي عندك
مكنتش اعرف انك انسان اوي كدة

شادي احمد:كنت دايما بتراعي مشاعري وتخاف عليا وعديت بيا لبر الامان في مواقف كتير اوي صعبة
وحسيت فعلا اد ايه انت بتحبني زي بوسي اختك

فاطمة حسن:قد تعجز الكلمات عن سرد دورك معي هذا العامولكن انتي اكتر واحدة عارفاه

بربارة عاطف:عجبني صمتك اللي واجهتي بيه كثيرا من المواقف معي
ذكري المشاركة في فيلمك كانت رائعة ،انا اصلي بحب التمثيل اوي
وبصراحة كانت احلي حاجة في الدور اني ضربت الولد وبهدلته
دايما كنتي بتسمعيني ايا كان الكلام اللي كنت بقوله
شكرا يابربارة

لميس:مش عارفة اقلك ايه بس انتي ساعدتيني في مشواري كتييير لا يمكن ابدا كنت اتخيل في يوم ان الشخصية الغلسة العدوانية
اللي مكنتش بطيقها ولما اعرف انها في مكان اتجنب الذهاب لذلك المكان ، كنت فاكراكي مش زينا كدة بتحبي الصحابك وتقفي جانبيهم
الحجات دي كنت فاكراكي متعرفيش عنها حاجة
بس انتي اكتر حد وقف جانبي
لايمكن ابدا هنسي انك انتي اللي متعرفيش تصحي قبل الضهر كنتي بتصحي عشاني من الفجر
وتصحيني عشان انزل امشي واجري
يمكن ساعات الصباح اللي كنا بنقضيها مع بعض يالميس
هي اللي خلتني اعرفك
وخلتني اعرف انك ممكن تبقي احسن صديقة الواحد يعرفها
زمردتي الغالية جايز تكون الايام غيرتنا بس مقدرتش تبعدنا عن بعض
ومقدرتش تغير حاجة في صداقتنا
يمكن قبل كدة واحنا قاعدين بنلعب اللعبة بتاعة الصراحة
سؤال وطلبتي مني ارد عليه اجابة اتخلي فيه عن الدبلوماسية اللي بتخنقك
انا دلوقتي هردعليه وبجد والله مش رد دبلوماسي
انتي لما سالتيني بتحبيني انا اكتر ولا سمر؟
وامتنعت عن الرد
بس دلوقتي هجاوبك
انتي وسمر عندي حاجة واحدة بتكملوا بعض وبتمثلولي حجات كتير اوي في حياتي
بس والله كتير سالت نفسي انا بحب مين فيكم اكتر ومعرفتش كل اللي اعرفه اني بحبكم وخلاص
-دايما كدة اسئلتك غلسة-

سمر:اكتشفت فيكي السنة دي بساطتك وطيبتك
احلي حاجة فيكي انك بتفوتيلي كتييييييير وبتعديلي اكتر
والحمدلله ان انتي كدة والا كان زماننا دلوقتي مش صحاب

امل عمر:احنا بقالنا كام سنة مع بعض والله يبنتي مش فاكرة
بس كل اللي اعرفه انك الوحيدة اللي بابقي علي طبيعتي معاها اكتر منا طبيعية
بشكرك علي مجهوداتك في الصلح مابيني ومابين عمك احمد هشام
دايما
وبشكرك علي مكان بيتك الاستراتيجي اللي خلاني اقدر اخد صورة حلوة لبياعين الروبابيكيا
اينعم هي مكانتش واضحة وحلوة اوي
بس لازم اشكرك بقي وخلاص

نانسي-نوسة- زعلت اوي لما شفت السنة دي في عينيك الحزن علي شجرنا اللي احنا زرعناه
ومات
انا كمان زعلت زيك يانوسة وعارفة انه ماتم ن الاهمال وان احنا كنا المفروض نهتم بيه منسبهوش للمزارع بتاع الجامعة
بس معلش لما نفضي هنزرع زرع كتير احلي وهنهتم بيه بنفسنا ونسقيه كل يوم
وهيعيش كتير ان شاء الله

مي:لازم تكوني معايا في كل سنة وافتكرك كل سنة عشان انتي مي،السنة دي اهو انا بقيت اسمع كلامك مش زي زمان
بس يامي انتي وحشتيني جدااااا انا ساعات بكره الظروف اللي بتفرقنا عن بعض
يوم عيد ميلادي انا اتضايقت عشان انتي مجيتيش بس في نفس الوقت فرحت عشان انتي كنتي في الشغل وانا هبقي مبسوطة لما تبقي ناجحة في شغلك
دينا وشيماء وهبة
دينا :كنت دايما فاكراكي قاسية عليا مكنتش اعرف ان قسوتك دي كلها حنية وانك بتحبينا قوي كدة
هبة:اخيرا بعد 3 سنين خرجتي من صمتك وبقيتي تتكلمي معانا واندمجتي معانا
شيماء:علي فكرة انا قصدي اكتبك اخر واحدة عشان في كلام كتير عايزة اقولهولك السنة دي
متزعليش مني لو جت فترة علينا وكنا مختلفين دايما ودايما كنت بستفزك وبخنقك
بس انتي اطيب قلب فينا واكتر واحدة زيي فيهم واكتر واحدة قريبة من طباعي عشان كدة بنختلف مع بعض كتير
بس ده مش هيغير من حقيقة صداقتنا وحقيقة حبنا وخوفنا علي بعض
ده كل الناس اللي اتاثرت بيهم السنة دي وقابلتهم يارب مكنش نسيت حد منهم
السنة دي برده حصلت فيها احداث جميلة اوي واحداث مؤثرة
السنة دي كانت خطواتي الاولي في حياتي العملية
السنة دي خدت خطوة ايجابية ونهيت علاقتي مع ناس كان لازم معرفهمش من زمان
السنة دي حاولت اخسر انسان عزيزعليا جدا وربنا سترها
السنة دي كانت زحمة اوييييييييييي
بس كانت جميلة
ويارب سنة 2007 تكون احلي واحلي