الجمعة، ٥ رمضان ١٤٢٩ هـ

من حقنا نحزن

لست بقانط من رحمة الله فانت تعرف انها وسعت كل شئ
ولكنك تتمسك بحقك في الحزن ..في ان تعيش مأساتك كما يجب ان تكون
ليه تمثل الفرح ..وانت مش فرحان
وليه تحاول تتغلب علي حزنك ده...وكأن السعادة هي طبيعة الاشياء
وبعدين اكتر لحظات بتبقي محلق فيها او شفاف ..هي لحظات الحزن والمرض
بجد اللحظات دي بتخليك تدرك اشياء لم تكن تدركها من قبل
انت مش بتحتاج تسأل عن حجات كتير ولا بتحتاج تسأل عن ناس لان درجة حساسيتك بالاشياء بتبقي عالية جدا
درجة الفضول عندك تصل للصفر ..لأنك في الحزن بتلاقي نفسك عارف تقرا كل حاجة
بطريقة تلقائية بتلاحظ كل حاجة حواليك ..يمكن عشان درجة ذكاءك بترتفع ويمكن كمان عشان بتسكت اكتر مابتسمع
في الحزن لما بتيجي تتفاعل مع الناس اللي حواليك بتبقي علي طبيعتك اوي ..مبتحسبش تصرفاتك ومبتحاسبش نفسك وكمان مبتدورش علي ردود افعال
وده لانك مش بتخاف تفقد الناس اللي حواليك ..هما لو مش قابلينك علي كدة ومشيوا ..يبقوا هما مكانوش يستحقوا معرفتك في الاول
في الحزن ياما تعمل نفسك زي الحمار اللي داير في ساقية وتشتغل بذمة وتنجح وتتفوق، وانت اصلا مش مهتم اذا كنت تنجح ولا تسقط
ياما تنحاز لجانب المبدعين وتقول انا مش عارف اشتغل ياجماعة.. وطبعا في جميع الاحوال اللي مش عاجبه يخبط دماغه في الحيط
في الحزن بتحاول تتخلص من اي علاقة انسانية كان فيها شبهة عبء عليك
يعني مثلا لو واحد بيعدي عليك الصبح وبتقوله صباح الخير وانت متحامل علي نفسك ..لو جه عدي عليك وانت حزين هتتف في وشه وبكدة تخلص علاقتكوا ويادار مادخلك شر....ومثلا كمان لو واحد صاحبك افتكرت انه خنق عليك في ليلة منتصف ايلول الماضي فلازم تحاسبه دلوقتي وتتخانق معاه خناقة لرب السما وتخسره كمان وفي نفس الوقت بيبقي مناخ جيد ايضا لنشأة علاقة هشة ترسخ بمرور الوقت ..لانك بتبقي محتاج تغير ريقك علي ناس جديدة ..ميكتشفوش حزنك ويشفوك انسان طبيعي
في الحزن بتبقي دماغك عالية اوي ..وتعرف تهزر كويس وتبسط الناس اللي حواليك وتضحكهم
في الحزن بتقيم كل يوم محاكمة سرية لشخص مختلف..ممكن يكون كل ذنبه انك ملاقتش حد غيره تحاكمه انهاردة
في الحزن تكره اللي يقولك مالك ؟ لان سؤاله ده ممكن يكون اختراق لحصن حزنك وتبديده ..متنساش انك لما تفضفض بتستريح ..يعني سؤال مالك ده لمحاولة القضاء علي حزنك
في الحزن بتظلم ..لازم تظلم
في الحزن بتحط كل الناس في خانة واحدة ..يعني هتصرخ في وشهم بصمت وتقولهم كلكم خونة ..او كلكم مش حاسين بيا، وفي نفس الوقت لو عدي عليك حد في الشارع وابتسم في وشك هتمتن ليه بشدة وتعتبره صديقك الصدوق
مع ان كل اللي حواليك ومش حاسين بيك بيبتسموا في وشك كل لحظة ..بس دول ولاد 60 كلب وعلي رأي المثل
زمار الحي لايطرب ..
في الحزن ممكن تلاقي جنبك شخص تاني حزين ..ساعتها بتتخلي عن حزنك وتحاول تخفف عنه وتطلع منك اصفي ابتسامة عشانه وتقوله ان الدنيا دي فيها حجات جميلة ..ومعلش بكرة تتحل
و...و ...
انا في رأيي المتواضع
ان من حقنا نحزن
من حق كل واحد يحزن ويتخذ الناس كلها اعداء ومن نفسه ضحية ومن الزمن جاني
من حقنا نعيش مأساة واتنين وتلاتة
بس مش من حقنا نخسر نفسنا حتي لو كان غصب عننا

ليست هناك تعليقات: