يعني ايه وطن ؟
يعني ايه حلم وردي وكابوس تشوفهم الاتنين في ليلة واحدة؟
وايه فايدة عقل يدرك ويستوعب ويعرف عن الحياة مايجعله يقدر علي العيش فيها
وهو عنده قلب عايش حتي وهو ميت؟
وايه فايدة الدوا ..وانت كل يوم بيقابلك واحد غبي يجي يكشف جرحك وينتهكه بأبشع الصور؟
وايه فايدة الالم ..وانت مفيش حد هيعرف يتفاهم مع المك ده
وايه فايدة ناس دمرت لك حياتك مرة
وعايزين يدمروها تاني؟
وايه فايدة انك تراهن عالنجاح وتكسب رهانك؟
هتعمل ايه بأم النجاح ده؟
هيفيد حد حياته مشوهة زيك بإيه؟
عشان يقولوا انك نجحت؟
نفسي اغيب عن الوعي شوية وارجع الاقي كل المشاكل اتحلت
بدل منا قاعدة بحارب طواحين الهوا
لاعارفة اكره الحياة ولا عارفة احب الموت واتمناه
متعلقة كدة في النص ..فقط ليتم انتهاكي
مش عايزة اي حد يعلق عالبوست ده
ومش عايزة حد يكلمني
ولا حد يبعتلي رسالة
ولا حد يقلق عليا لاسمح الله
واحدة ومفيش بينها وبين الحياة عمار
قدرها كدة
عيشوا انتوا حياتكوا -السعيدة-بعيد عني وعن اللي خلفوني
هناك ٣ تعليقات:
رحلتي من الايمان الى الكفر..مش عاجبني العنوان
وايه فايدة الدوا ..وانت كل يوم بيقابلك واحد غبي يجي يكشف جرحك وينتهكه بأبشع الصور؟ما انتي قولتيها واااحد غبييي
وايه فايدة الالم؟
عشان تعرفي قيمة النور لازم تجربي الضلمة
ناس دمرت لك حياتك مرةوعايزين يدمروها تاني؟
ناس حقودة والشر موجود على الأرض منذ بدء الخليقة
حياتك مشوهة؟لا دي زي الفل بس انتي اللي حساسة ومش واخدة بالك من كل حاجة حلوة حواليكي
مشاكلك هتحل
ان بعد العسر يسرا
مش عايزة حد يعلق على البوست؟
طب سايبة لية مكان للناس تعلق؟
مش عايزة حد يكلمني اويبعتلي رسالة
عارفة لو قفلتي موبايلك هاوريكي
عشان انا هاكلمك بس لما ارجع من المشوار بتاعي
واسمحيلي بقى انا هاقلق عليكي عشان انا من اللي خلفوكي
وانا كمان هقلق ، واعترض ، واشجب ، وادين ، واصرخ ، وابكى ، عشان تفوقى ، ليذهب كل الاغبياء الى الجحيم ، والمشاكل عن ابوها ما اتحلت ، والناس عنها ما عاشت حياة سعيدة ، اتمسكى بحقك فى الحياة ، وبلاش تسمحى للاغبياء يستبيحوا جرحك ، ومتخليش الناس تموتك ويقولوا كافرة انتحرت
من قمة الحماس إلي قاع .....
غريبة اوي هو ليه كل واحد مننا شايف انه لازم يرضي كل الناس عنهم ما اترضوا عنهم ما زعلوا ولا فرحوا محدش بيشل هم حد غير نفسه محدش بيحزن لحد ومحدش بيفرح لحد غير الحد ده نفسه اذا كانت الدنيا مهببة ومنيلة وحالتها نيلة يبقي اوك بس اعمل اللي ع مزاجي واعيش الدنيا زي ما انا عايزها والمهم يكون اسمي عملت اللي عايزه مش اللي حد تاني عايزه ...لو حتي شايفه ان هروبك هو الحل اعمليه بس باقتناع من جواكي لو شايفه الحل لو ع الجرح ما فيش جرح مش بيلم لو ع الناس عمرها ما هترضي لو ع المشاكل عمرها ما هتخلص لو ع الموت أكيد جاي جاي بس في ميعاده
إرسال تعليق