واول موقف كان بيني وبينها
لما رحت المسجد وكانت هي قبلها بتصلي فيه
وانا مكنتش اعرف انها هي اللي كانت متجمعة معانا انا واصحابي من شوية
فمكلمتهاش خالص
وطول الطريق انا شايفاها رايحة للمكان اللي كلنا كنا قاعدين فيه بس مكنتش اعرف انها هي
لما وصلنا احنا الاتنين عند اصحابنا-هي وصلت قبلي-
سالتني مش انتي اللي كنتي بتصلي معايا في المسجد ماستنتنيش ليه
فمردتش عليها واتحرجت منها وعدي الموقف علي كدة
بعدين في اليوم ده كنا قاعدين كلنا انا واعز اصحابي وقال ايه
هيلعبوا لعبة الصراحة
وافوجئ بالسؤال الرئيسي اللي دايما يتسال في اللعبة دي لما جه عليا الدور
انتي مرتبطة
طب حبيتي
ولايمكن انساها لما سالتني السؤال ده
من الاخر ياجماعة البنت دي علمتني كتير وانا اقولكوا ليه
انا كنت في الاول بحاول اتجنبها شايفاها متحررة جدا
انا اكيد مش بكرهها بس في نفس الوقت مش بحبها
متكلمناش اساسا كلمتين علي بعض
عشان اكرها ولا احبها ولا اطيقها ولا مطيقهاش
بس معرفش كنت متهيباها
مع الوقت كنت بدور علي فكرة لمشروعي
وفي حد اقترح عليا فكرة المدونون
انا بقيت افتح المدونات كتير
وبالصدفة لقيت مدونات لناس ميعتبروش اصحابي بس اعرفهم
ومنها كانت مدونتها
لاقيت حجات غريبة
معقول البنت دي تكتب ده
لاقتها عندها ملكة الكتابة رهيبة
مثقفة الي حد ما
عندها احساس عالي وراقي جدا
مش متحررة اوي زي منا فاكرة كدة
عندها ذوق في التعامل والرد
بقيت متضايقة
هي دي البنت اللي كنت بتجنبها
قدرت تستحوذ علي شئ من حبي واحترامي
واكبر دليل علي كدة
اني بكتب عنها البوست ده
اللي معتقدش انها هتشوفه في يوم من الايام
وبقولها بجد اتعلمت منك حاجة حلوة اوي
وهي اني محكمش عالناس بالظاهر واني لازم اعرف اللي ادامي الاول قبل ماخد عنه انطباع سواء سئ او حسن
وبجد انتي انسانة حلوة اوييييييييي من جواكي
هناك ٩ تعليقات:
بسم الله الرحمن الرحيم اللهم صلي و سلم و بارك على صفوة خلقك و تاج أنبيائك سيدنا محمد السراج المنير و البشير النذير و على آله الأطهار و صحبه الأخيار و كل من توسل بحضرته إلى يوم الدين.
بهنيكي يا أميرة على مدونتك و حبيت ابدا بالبسملة و الصلاة على سيدنا محمد صلى الله عليه و سلم في أول " بوست " فيها عشان تكون نور و بركة في المدونة ، و خير استهلال لكتاباتك و ردودي إن كان للفقير إلى الله عمر.
بالنسبة للبوست الجميل ده ، ممكن نبتدي بايضاح الفرق بين 4 كلمات : المحاكمة ، الشهادة ، المعاشرة ، المعرفة .
محاكمة البشري للبشري فيما هو يخص البشر كالغش و الخداع و الزور الربا إلخ جائزة ، بل واجبة بالنسبة لنا كمؤمنين من منطلق الأمر الإلهي
أما محاكمة البشري للبشري فيما يخص الله غير جائزة ، لأنه لا يستطيع بشري أن يعرف ما في سريرة بشري مثله ، و ما يؤمن به في قلبه و ما لا يؤمن ، و ما يتمسك به من أخلاقيات و ما لا يتمسك
لغاية هنا تمام ؟
إذن معاكي في عدم محاكمة الآخرين في مسائل زي الأخلاق و الإيمان و الكفر ، إلى آخر هذه الأحكام المطلقة
و لكن
ما هي الشهادة ؟ الشهادة هو أن تدلي بما رأيتيه أو سمعتيه بنفسك من فلان أو فلانة ، إذن انتي هنا مضطرة تشهدي بالايه ؟ بالظاهر .. باللي وصلك .. باللي شوفتيه انتي و مش شرط يكون تفسيره صح زي اللي في اذهاننا و لا لا
و لكن الشهادة بالظاهر تظل شيء اساسي و ضروري في أحيان كتير ، لإن مهما كان مش هتقدري توصلي لداخل كل إنسان ، فمثلا حديث سيدنا النبي صلى الله عليه و سلم : إذا رأيتم الرجل يعتاد المساجد فاشهدوا به بالإيمان . إذاً علينا اننا نشهد لإن ده اللي وصلنا منه
و في نفس الوقت ماحدش قال اننا نحكم عليه انه كذا ، و لكن دي مجرد شهادة ، المشهود عليه يتحمل جزء كبير منها تبعا لتصرفاته
فقد أمرنا الله تعالى باتقاء مواطن الشبهات
يعني شاب عايز يبقى محترم لنفسه و آدميته و لدينه ما يتسلاش بالمعاكسة التليفونية او الكذب عالشات للتعرف على البنات و في الآخر يقول انا طيب و مش قصدي شر و لكن بسلي روحي و مش باذي حد
و بنت محترمة عايزة تكون متدينة ما تلبسش لبس ضيق او قصير او بدون حجاب و تقول ربنا رب قلوب و مش شرط اكون متحجبة عشان ابقى محترمة
يمكن المعاشرة لا تأتي إلا مع الأهل و المعاشرة من نتائجها التطبع ، بمعنى إن العشيرة الواحدة بتبقى طباعهم في أغلبها واحدة ، و من عاشر قوما أربعين ليلة صار منهم كما قالوا
أما المعرفة فكفاية نعرفها من المثل المصري الأصيل : تعرف فلان قلت آه قال عاشرته قلت لا قال تبقى ما تعرفوش
معلش طولت يا اميرة ، بس كان قصدي إن مش دايما الناس بتطلع زي ما احنا متصورين عنها و في جميع الأحيان مش من حق إنسان إنه يصدر حكم على إنسان تاني ، تاني شيء ما تلوميش نفسك دايما لو ظنك في شخص مكنش في محله لإن تأكدي إن تصرفاته كانت سبب رئيسي في ظنك ده ، و الإنسان منا يظل ضعيف قليل الحيلة ما يعرفش الغيب و لا اللي في الصدور ، نسأل الله أن يفتح علينا من علمه و ينير لنا ما في الصدور
؛ تحياتي
شكرا جدا علي تعليقك ياشادي
وعلي ايضاحك لبعض الامور
وبجد نورت مدونتي
وعقبال باقي الاصدقاء مينوروها زيك
ميرسي يا فندم .. المدونة جميلة
و منورة بالصلاة على سيدنا النبي :)
عليه الصلاة والسلام
أميرة المدونة دي جميلة في حاجات كتير ، عارفة ليه في رأيي؟ لانها فيها تفاصيل كتير في وجهة نظري انتي اختصرتيها. لو كانت دي شخصية حقيقية فعلا وقصدك انها اسمها اميرة فعلا فانتي موضحتيش انتي ليه مش بتحبيها ولو انك لمحتي لده في اخر المدونة عن انها تبدو مش ملتزمة شوية ظاهريا، بالرغم ان اول فقرة انتي قلتي انك قابلتيها في مسجد الي بيمثل الالتزام لينا كلنا وده بالنسبة لي عمل تناقض شوية سراحة.
هل انتي يا اميرة كنتي بتبعدي عنها علشان التناقض في شخصيتها هي ولا التناقض ما بينها وبينك انتي ؟ لان ده سؤال مهم جدا. ويمكن شادي لما قال العشائر بتتشابه في الصفات فده مقابل للوضع ده .. بمعنى انها علشانك شفتيها مش شبهك ومش بتعمل زيك فانتي حسيتي بالغربة بينك وبينك وحبيتي تبعدي علشان تاكدي التناقض في ما بينك وبينها.
أجمل حاجة فعلا يا اميرة في المدونة دي هي اعترافك بالحق. وانك مش عنيدة في رايك وبتفكري وبتحكمي بعقلك. وحتى لو كان ده مش من اول مرة فهو حاجة جميلة اوي يا ريت تكون فينا كلنا.
اخر حاجة يا جماعة علشاني طولت عليكم اوي ... انتي يا اميرة مرتبطة؟ طيب حبيتي قبل كده ؟ :)
اولا يااثير شرفت مدونتي
اهلا بيك بجد
ثانيا ميرسي علي ردك عالموضوع بدون اي مجاملات
والبوست ده بالذات مكانش ينفع اوضح فيه معلومات اكتر عن البنت لانها شخصيةو حقيقية ومش عايزين ازمات دبلوماسية
بالنسبة يبني للحب فانا حبيت يدوبك 88969595404043030مرة
وبالنسبة للارتباط فانا حاليا مرتبطة بالمزاكرة وممكن بعد متخلص السنة دي
معنديش مانع لو حبيت تيجي تشرب شاي وتاكل كيك عندنا في الصالون
او تجيب اي حد يبقي ضحية بدالك
نياهاهاهاهاهاهاه
تحياتي لك
يااثير
ربنا معاكي ويوفقك في دراستك يا رب.
و"يخلعك" منها بالف سلامة على خير السنة دي ان شاء الله.
مش الحمد لله يا اميرة خلاص دبستو عبد الرحمن وايهاب في مدونة "اميرة وعلا حسن الختام" .. انا الحمد لله سيرتي مجتش فيها .. وعدت على خير :))
لا انت مقرتش كويس
عبدالرحمن وايهاب دول اللي قعدوا يدوروا عالعرسان واول مابسام جابهم
هما اللي ربطوهم في الكراسي
لا روح اقرا المسرحية تاني بتركيز
إرسال تعليق