في ممر جمانة حيث تم نصب كوشتين للعرايس العروستان تنتظر مجئ العرسان
أميرة : بينها وبين نفسها في قلق ياتري فعلا ممكن العريس يجي؟
علا : بينها وبين نفسها إيه الحيوانات دول-تقصد العمال اللي عملوا الكوشة-،مش عارفين يعملوا كوشة غلط غلط المفروض الكوشة مش بتتعمل كدة
يعمل الجمانيين علي تجهيز الفرح قبل مالعرسان تيجي تدخل بارة الممر ومعها مايكل (ابنها)معلش ياجماعة اتأخرت
علا متقلقيش لسة العرسان مجوش
فجأة يسكت الجميع ويدخل بسام في موكب جنائزي وفي يده العرسان ويسلمهم إلي العروستان بقرف وبسرعة يأتي عبدالرحمن وإيهاب لربط العرسان بحبل متين في الكرسي حتي يأتي المأذون ويجلس بسام في ركن بعيد ويبدو وكأنه يخطط لشئ ما
تنادي أميرة عبدالرحمن ويرد عليها :نعم
أميرة :انا لسة محتارة وحاسة ان مشاعري لسة منضجتش وخايفة ،تفتكر لما يجي المأذون أوافق ولا لا؟
عبدالرحمن بغيظ: بت اتلمي مش ناقصين بدل مااديك علي وشك احنا ماصدقنا
ويلتفت لايهاب وضيا يلا نشوف البوفيه فيه ايه
ايهاب :لا انا هروح اضرب كشري في السريع
عبدالرحمن :طيب متنساش نفسك وتعالي بسرعة عشان انت اللي هتقف تحاسب المأذون
اما علا فهي منسجمة مع عريسها جدا وقاعدين يرغوا مع بعض ومكبرين لاي حاجة
يدخل شادي ليقطع حديثهم قائلا للعريس:انا بوصيك علي علا ،حطها في عينيك واوعي تزعلها
عريس علا:في عينيا ياشادي
يتركهم شادي ويقترب من عريس أميرة:بوصيك علي بوسي ،اوعي تزعلها
عريس أميرة:حاضر بس علي شرط
يرد شادي باستغراب:شرط ايه ؟
عريس اميرة: تجاوبني عالسؤال ده كل البنات ليهم اسم واحد اشمعني هي ليها اسمين؟
شادي :خلاص متاخدش بالك منها احسن ،انا لسة هقعد اشرحلك
ويذهب شادي ليجلس بجانب ندا والدريني
ندا يحدث شادي والدريني مستنكرا:ايه الفرح الممل ده؟
تفاجأهم أميرة وهي تقف امامهم وتصورهم
دريني : محبكش يااميرة التوثيق دلوقتي روحي ياماما اقعدي في الكوشة
أميرة:انا قلت اخدلكوا صور في السريع
الدريني :طيب يلا ياماما روحي الكوشة يلا بسرعة عشان المأذون وصل خلاص
محمد علي الدين:هاتي يابوسي انا هصورلك الفرح
يصل المأذون ويتسارع الجمانيون للشهادة علي عقد القران ولكن يكتشف الجميع عدم وجود بطاقاتهم يبتسم بسام في خبث
يلاحظ ندا بسام ويعرف انه الفاعل ولكنه لايقول
ندا يقترب من بسام :نياهاهاهاهاهاهاها نسيت تاخد بتاعتي يقترب ندا من المأذون ويقوله خد ياسيدنا الشيخ
علا معترضة:انا ميشهدش علي فرحي حد بطاقته مقسومة نصين
ندا :يعني هو انتوا لاقيين اصلا بلا خيبة
المأذون طب والشاهد التاني
أميرة : ممكن ياسيدنا الشيخ طالما البطاقة مقسومة نصين يبقي كانهم بطاقتين
ندا ينظر إلي أميرة بغيظ :ويقول بينه وبين نفسه معلش استحمل انهاردة برده فرحها ومش لازم نعمل مشاكل
ندا :انا هكلم احمد فؤاد الدين يجي ببطاقته
وفجأة تجري أميرة خارج الممر منادية:هشام هشام
هشام ينظر لها باندهاش: اده هو فرحك انهاردة بجد انتي يبنتي لما عزمتيني افتكرتك بتهزري مش قادر اتخيل الشخصية الانتحارية اللي هتتجوزك
أميرة :ماعلينا ياهشام انت كنت جاي الجامعة تعمل ايه
هشام :ملكيش دعوة
أميرة :طيب طيب هات بطاقتك وتعالي بسرعة عشان تشهد علي كتب الكتاب
هشام :دايما كدة يااميرة ليكي حجات غريبة
ياتي هشام ليشهد علي عقدا القران
فتقوم علا فجأة :لااااا أنا محدش غريب يشهد علي عقدي
شادي :معلش ياعلا مضطرين خلي اليوم يعدي
علا :طيب
بعد اتمام عقدا القران تزغرط شادية وبارة وتاتي فاطمة لتدخل بسرعة الفرح وهي تزغرط
بارة :اتاخرتي ليه يافاطمة
فاطمة:عربية محمود عطلت في الطريق وطلعت عنينا
بارة :ولا يهمك
ايهاب يحاسب الماذون: هتاخد كام عالراسين ياباشا
الماذون : 600 جنيه ان شاء الله
إيهاب :هيا مياية وابقي كدة كارمك اخر كرم
المأذون :ياعم هتكفروا الواحد 100 جنيه بس اللي هاخدهم في الجوازتين دول ده انا جيت لاقتكوا رابطين العرسان بحبل في كراسيهم خايفين ليهربوا
أميرة: (وهي جالسة عالكوشة بصوت عالي) إيهاب خليها بريزتين كبار ولو الطلاق تم السنة دي يبقي ببلاش
عبدالرحمن: (يهمس في اذن ايهاب) خلي الليلة تعدي ياايهاب انت ناسي احنا تعبنا اد ايه علي بال ماجبناهم ده احنا مرت علينا ايام ياراجل كعب داير في الشوارع في عرض عريس
ايهاب :خلاص هزودله كف مريم
مشهد رومانسي بين العرسان علا مع عريسها:ايه يبني انت هتبصلي كدة كتير بقلك اسمع النكتة دي
عريسها :ايه يبنتي متديني فرصة اقلك كلمتين حلوين ولا ابصلك بصة رومانسية زي مكل الناس بتعمل يوم فرحها
علا(:بينها وبين نفسها )ماله ده ؟ وتنظر ناحية أميرة
عريس اميرة :انتي بترني لمين دلوقتي
اميرة: برن لنفسي عشان اشوف نمرتي مشغولة ولا لا
عريس اميرة بينه وبين نفسه لاحول ولاقوة الا بالله
موبايل بارة يرن تنظر باستغراب وتقول :اميرة!!!
بربارة تذهب للكوشة وفي يدها مايكل ابنها وتقترب من اميرة
اميرة لبارة في اذنها: انا خلصت كل الكلام اللي ممكن يتقال وهو لسة مفصلش مني اعمل ايه؟
بارة :سيبيه هو يفتح الكلام معاكي
اميرة :طب لما اجي ارمي بوكية الورد ارميه بايدي اليمين ولا الشمال؟
بربارة :اليمين ياحبيبتي
اميرة: طب لما يضحكلي اضحكله ولا اعمل نفسي مش واخدة بالي
بربارة:خليكي علي طبيعتك
مايكل بصوت عالي :هي طنط اميرة عبيطة ولا ايه ياماما؟
بربارة: عيب ياولد اسكت بدل ماتصل اقول لبابا
وعلي الناحيةالاخري ندا يكلم نفسه ايه ياربي الفرح ده مفهوش حريم عدلة ده ايه الحظ المهبب ده يذهب إلي الاستيدج وياخذ المايك من الدي جي ويطلب سبيشيال ريكويست اغنية العنب تراه شادية من بعيد يمسك المايك فتريد ان تاخذه منه
ندا :شادية سيبي المايك واطلعي من نفوخي الساعة دي
شادية :انا عايزة اقول حاجة مهمة
ندا :مفتكرتيش غير لما انا مسكته
شادي :خلاص ياندا سيبهولها تقول اللي هيا عايزاه وبعد كدة خده انت بقية اليوم
شادية في المايك: انا بهني العروسين وبدعيلهم دعاء الزواج-بارك الله لكما وبارك عليكما وجمع بينكما في خير بمجرد ان تنهي شادية كلامها في المايك يخطفه ندا منها بعنف
ندا:مع ندا شو مش هتقدر تغمض عينيك نياهاهاهاهاها وتبدا اغنية العنب وتدخل دعاء صاحبة علا في بدايتها لتقوم بالواجب ويذهب احمد ابراهيم ومها عشان يجيبوا العرسان يرقصوا
احمد ابراهيم لعلا وهم في الطريق الي الاستيدج: جبنالك معانا كيلو جوافة من اللي قلبك يحبها بس عايزين حد يغسلها
علا :مفيش مشاكل نبعت اميرة تغسلها بس عشان محدش ياخد باله نديها الجاكت بتاعك تحطه فيهاعشان هو كيلو واحد وشكل الجمانيين كلهم بيحبوا الجوافة
يذهب العرسان جميعا للرقص ويلتف حولهم الجمانيين يصقفون ويرقصون وفجأة يكتشفوا غياب اميرة الكل قلقان ومش عارف هي ممكن تكون راحت فين
ضيا :اكيد ياجماعة راحت تشتري حاجة وجاية انتوا قلقانين ليه
عبدالرحمن:اسكت ياله ويكلم نفسه عريسها يقول علينا ايه دلوقتي
شادي :خير ان شاء الله ياجماعة
بسام يتصل بها عالموبايل فتكنسله
بعد مرور نصف ساعة من القلق تظهر اميرة
الجمانيين في صوت واحد كنتي فين يااميرة
اميرة ببرود شديد:ابدا ياجماعة اصل انا كنت جعانة اوي وزهقت من العريس وفصلت منه وكنت شايلة معايا كوارع وحتة حلاوة وبصراحة كنت عايزة اكلهم لوحدي فاستغليت فرصة انه بيرقص معاكوا وقلت اروح اكلهم
الليل لسة طويل وانتوا مخلتوش حاجة في البوفيه كنت اعمل ايه يعني ؟ اقعد جعانة
يخيم الصمت علي الجميع من الذهول ثم ينهال الجميع عليها ضربا
النهاية
هناك ٧ تعليقات:
جزيل الشكر لك ياحاج تهامي
وعلي فكرة مدونتك حلوة اويييييي
ومضمونها اكثر من رائع
بس اسمها مش عاجبني
يمكن لو قلتلي المغزي منه اتقبله
مش فاهم اى حاجة فى ممر جومانا بتاعنا
فكرتني بالذي مضي ياقمحاوي
ده كان يوم له العجب
هو كان في جمانة بتاعنا في الجامعة
بس ده لاسباب
احنا كنا الاول عاملينه في حارة زينهم وكنا هنعزم كل الناس
بس المجاري بقي منها لله غرقت الحارة في اليوم ده
فكتر خيرهم شباب جمانة اتبرعوا وعملنا الفرح في ممر جمانة
بقى أنا يا أميرة تدبسينى التدبيسة السودة دى يا ستى مش عايزة اتنيل لسه المعدوم قدره ما عداش قدامى وسحرنى ولا انتى رأيك ايه يا ست الستات؟؟
ياعلا بقي الحق عليا
اني وصيت عبدالرحمن زي مايجيبلي عريس يجيبلك معايا
عشان نبقي اخر البنوتات الجمانيات المتجوزين
وبعدين جواز البنات سترة
و احنا معندناش بنات يتجوزوا عن حب هنا
عدي ادامي وسحرني ايه
حدانا في البلد لو سمعوكي بتقولي كدة يطخوكي
عالعموم اللي حصل حصل بقي
وبعدين ياستي هو انا كنت اخترت عريسي
اللي جبهولي عبدالرحمن خدته منطقتش
يعني اهو زي بعض
نياهاهاهاهاهاهاهاه
وعالعموم اللي انكسر ينصلح تخلص الامتحانات
واكتبلك مسرحية نطلق فيها منهم
وساعتها اخليكي تنقي عريسك بنفسك
يلا ياستي عشان متزعليش
هاي اميرة وجومانة جروب،
بلوجز جميلة.. صحيح انا مقدرتش افهم مسرحية اميرة وعلا حسن الختام علشاني ما اعرفش جروب جومانة .. وما اعرفش طبيعة الشخصيات في المسرحية دي الي واضح ان اميرة يذلت مجهود في تحليلها كويس اوي علشان تحاول تتوقع وتتخيل يا ترى ايه موقف ومكان وكلام كل واحد في الشخصيات دي وفي الموقف ده.
يمكن بس انا ملحظتي السلبية شوية معلش وده رايي الشخصي على فكرة المسرحية ان اميرة عاملاها بشكل خيالي انو فرح في ممر جمانة وعاملاه مسرحي مش تمثيل حقيقي خاصة ان الشخصيات حقيقية. كمان النهاية دي مش شخصيتك خالص. بس هي على اي حال ظريفة وافتكر ان لو شخص له احتكاك بشخصيات المسرحية اكيد حتكون ممتعة له اكتر. اتمنالك التوفيق في كل كتاباتك.
اثير هي المسرحية فعلا خيالية وملهاش علاقة بالواقع
كانت زي شخابيط كدة بشخبطها مع نفسي
وشخصية اميرة هنا في المسرحية شخصية بعيدة خالص عن شخصيتي
بس هي اتكتبت كدة وجت كدة وعلي فكرة انا متعبتش في تحليل حد
هي جت كدة
مفكرتش حتي هتتكتب ازاي
تحياتي لك يااثير
ودمت في رعاية الله
وخطوة عزيزة
إرسال تعليق