هدوء تام
حجرة نصف مضيئة
وجهاز كمبيوتر اجلس عليه
منضدة عليها اشياء مبعثرة
شوية لب بقزقزهم -باكلهم يعني- وبرمي عالترابيزة بعبثية شديدة زي عبثية الاشياء المبعثرة
بفتح الماسنجر
يطالعني نيم احلي سنين العمر بينا تمر
يلاقي هوي في نفسي فلا انوي تغييره
ولكني اضيف بيرسونال مسج
محاولة حياة ...... سكوت بنصور
تناديني امي وتذكرني بشئ ما
استجيب وانفذه في صمت
وبدون تذمر فأمي معذورة ولم تقرأ البيرسونال مسج
اعود لاكمل الكتابة
وقبل ان ابدأ في كتابة شئ احمد الله كثير الحمد ان والد احمد الدريني السيد محمد الدريني خرج بالسلامة من المعتقل
لاني معتقدش اني كنت هعرف اكتب البوست ده وهو لسة جوا
اه انتوا لسة متعرفوش الحكاية
انهاردة عيد
عيد ميلاد مدونتي
زي انهاردة من سنة كاملة كنت قاعدة هنا بردو وبكتب بوست
شوفوا الايام عدت بسرعة ازاي
ياسلااااااام ياولااااد
بس استغربت اوي لما فتحت ولاقيت اول بوست لامعرفة فيه نفسي ولا كاتبة مقدمة والا اي حاجة
انا ابتديت ببوست موضوعه عابر
بس ماعلينا
كنت دايما بقول زمان لواحد صاحبنا الله يرحمه
مش مهم احنا ابتدينا منين ...المهم احنا رايحين فين
كان بيضحك لانه عارف اني لاعارفة بداية ولا نهاية للحياة اصلا لاني كنت لسة مش جتها
بس عشان كدة دعوني اتغاضي عن البداية وابص انا رايحة فين
هلاقيني مش عارفة انا ابتديت كدة ليه ولا عارفة انا رايحة فين
اقولكوا سبنا من موضوع البداية والنهاية
خلينا في عيد ميلاد المدونة
معلش يبنتي ملحقتش اجبلك تورتة وشمعة
لاني افتكرته بالصدفة
وكنت بصراحة مش مستعدة لان اليوم بادئ من اوله شديد الالم علي نفسي
اوله احمل رفات الذكريات وادفنها حيث لارجعة
نعم اضطررت لقطع علاقتي بشخصية ما
قد تكون شخصية قميئة
احم احم نغير لفظ قميئة ده بناء علي طلب الجماهير
شخصية زباااااااااااالة
بس بردو اتضايقت وانا بعمل كدة وخلاص
طب الظاهر ان ابويا جه وهضطر اقفل مؤقتا لانه بيناديني
وهعود للكتابة ثانيا في يوم عيد ميلاد مدونتي
ابقوا معنا بعد الفاصل
رجعت بعد ساعتين اهو والساعةن دلوقتي 11
اصلي بصراحة اتكلمت مع بابي شويةوشكرته جدا علي النسكافية لحلو اللي هو جابه وهو قاللي متستاهليش
قلتله اهو جه وبشرب فيه وخلاص بقي،كان بيقلب في النتيجة هو ميعرفش عيد ميلاد مدونتي بس وهو بيقلب قلتله الحدث الهام فاضل عليه 17 يوم.... بصلي وقاللي لا انا بشوف العيد جاي امتي؟
قلت بيني وبين نفسي علطول كاسفني كدة
ماعلينا
بعدها بقي كنت بردانة موووووووت فقررت انام
وصحيت علي تليفون حد من صحابنا
بيسالني علي رشا لان احنا قلقانين عليها من الصبح عشان مش بترد علي تليفونها
المهم رجعت اكتب تاني بس المرة دي مش معايا شوية لب
معايا طبق عدس قاعدة بنقنق فيه وانا بكتب
اه صحيح اتفضلوا ياجماعة البيت بيتكوا والله
ماعلينا
بصراحة مش عارفة اكتب ايه؟
بس قبل مانولع شمعاية علي راس التورتاية اللي جابوها الحبايب
ممكن اكتب بس عن احداث اليوم انهاردة بما انه يوم تاريخي
انهاردة سمعت احلي كلمة ممكن اسمعها من صديق عزيز عليا
- اتأثرت اوي عشان عرفت ان دودو صاحبتي قربت تسافر
- قابلت اصحاب مدونة دبدوب وقلب احمر وخلينا اخوات وبصراحة سعدت بمقابلتهم
- اتألمت جداااا عشان حد من صحابي عنده امنية مش عارفة ممكن تتحققله ازاي بس معرفتش اعمل حاجة غير ابص للسما واقول يارب ابعتله كل حاجة تفرحه اوي اوي يارب
- و علي صعيد آخر كان نفسي بس اجي بدري شوية في الاحداث اجي حتي عشر دقايق بدري في مدة الفيلم
لاني كان نفسي ازايد علي الاحداث واغيرها واقنع ناس باشياء ما
بس القدر جابني متاخر لاحضر انكسار احلام وحجات سخيفة تانية
اده بقي احنا شكلنا كدة هنخش في جو نكد
اقولكوا باختصار شديد
وبرغم كل شئ
انهاردة كانت محاولة حياة
خلاص خلصت كلامي
يلا ولعوا الشمعة
سنة حلوة يامدونتي
سنة حلوة يانا كدة ومفيش غير كدة عندي
سنة حلوة ياجميل
سنة حلوة ياجميل
هففففففف
طفينا الشمعة خلاص
حد بقي يولع النور
ايه النور قطع؟
يالهووووي
طب وهنفضل في الضلمة دي لحد امتي؟
امممممم
عالعموم الفجر جاي
هيطلع وينور الدنيا
بس يارب بقي ميتأخر
__________________________________-
في النهاية اود ان اتوجه بالشكر الي كل اصدقائي الذين كانوا سببا في سطر معظم سطور مدونتي
شكر خاص الي مساهمات الاصدقاء في الصور
نها فكري عن صورتها لبوست ادينا بنهرتل ورانا ايه؟ وامتي تتغير نظرتك للموقف ؟ ول تشعر بنقص في مشاعرها
احمد حربية عن صورته لبوست ننسي اللي فاتنا ونعيش حياتنا
والاخير اللي عمال بيحبلي في مصر وطلب مقولش اسمه عن صورته لبوست الصباحات المعذبة "فوضي الحواس وصورته للبوست ده محاولة حياة ..سكوت بنصور
واللي بحذره عالهوا لو اتريق عليا تاني انا او صاحبتي هعلن عن اسمه في قلب المدونة هنا
واخيرا شكر متميز جداااا للشخص الوحيد الذي استطاع فهم مغزي اسم مدونتي مقارنة بشخصيتي
هناك ١٣ تعليقًا:
كل سنة وهي وانتى طيبين
:)
كل سنه وانتى مدونه رائعه يا حبيبتى
:)
عقبال ما تفتحي فروعا أخري لمدونتك التوكتوكية المنشأ والمنزع يا اميرة يا (هاشم)
كل سنه والمدونة طيبة
قد كده التقدم ممكن يخليني اقول كلام اهبل
كل سنه وانتي طيبة وسعيدة بمدونتك
وتفضلي كده -ومفيش غير كده- علي طول
عقبال 100 سنة لمدونتك الجميلة يا اجمل بنت عرفتها
ربنا يحققلك كل احلامك
اعذريني علي قلة ذوقي معاكي
سامحيني كنت اتمني اشاركك كل لحظة حلوة ومرة عدت عليكي الفترة اللي فاتت زي ما انتي شاركتيني
بس يظهر اني مش قوية كفاية
مبروك وعقبال الف مدونة
سأحتفل على طريقتي
هناك
حيث أغلقت عليك صفحة وأعطيتك مفتاحها
وإن كان لابد أن أتوجه بالشكر مسجلا حضوري وسط هذا الحشد من البشر لعد الفجر ما طلع ونور الدنيا لشخصك الكريم الذي كان سببا في سطر معظم سطور مدونتي
كل سنة وانتي سالمة تقبريني ولك بنتي
كل سنة وانتي كده
ومفيش غير كده
عندك
:-)
كل سنه ومدونتك متألقه دايما
وتكونى دايما بخير يا ميرو
ويارب بوست السنه الجديده فى مدونتك
تكون احسن من الماضيه
بس اخص عليكى يا ميرو
تطفى الشمع من غيرى
كل سنة و انتي طيبة يا ميرو يا جميلة
البوست كله عفوية و طفولة زييك
يارب السنة دي تشهد المدونة بوستات كلها تفاؤل و حب
ميرو
كل سنة وانتى ومدونتك الجميلة طيبين
كل سنة وانتي طيبة يااميرة ويكون ربنا حققلك الي نفسك فيه
دمااااااااااااااااااغ آخر حاجة!!
أنا أول مرة أدخل مدونتك يا بنتي ... مسخرة !
بجد حلو جداً البوست والله!
لكن بلاش اللب الكتير عشان بيطخن ، و بيجيب ضيوف
ولا خليهم ييجوا ... هو كان بيتنا؟؟
والله فرصة سعيدة جداً
هواري:وانت طيب وبالصحة والسلامة ياجميل
وسام: وانت طيبة ياجميلة
احمد : هو فرع واحد بس ..بس انتوا ابقوا تعالوا زوروه علطول
المواطن بالانجليزي رجب :مش مهم انت دلخت وكتبت ايه ؟ المهم انك نورت وشرفت مدونتي
بربارة :سامحيني واعذريني
ايه الكلام الكبير ده يبنتي
من امتي واحنا بنستخدم الكلام ده
المهم عندي انك تكوني بخير وبسسس مش عايزة حاجة تاني
بسام: وانت طيب يابسام ،بس هو يعني ينفع تحتفل بيا من غيري
وهناك ده فين بقي؟
الفراشة الصغيرة: الدعوة عامة يارودي بس انتي اللي جيتي متاخرة
بس ادينا اهو لسة في العيد ميلاد
خدي تورتة بقي :)
ميرو: نورتي المدونة ياميرووووو وكل سنة وانتي طيبة
خلود:وانتي طيبة وبالصحة والسلامة وعقبال عيد ميلاد مدونتك ويبقي احلي واحلي
رضا : وانت طيب يارضا وبالصحة والسلامة ،نورت المدونة ياباشا
سارة سويدان: اول مرة تدخلي مدونتي ويارب متكون اخر مرة
وفعلا هي فرصة سعييييدة جداااا انك تيجي تزوريني ياسارة
واسمحيلي ان احنا نتبادل الزيارات
نتقابل هناك عندك بقي في البيت ومتبقيش تقطعي
تعالي هنا علطول
كل عام و المدونة طيبة .. بس أهم حاجة النية فى جعلها أفضل مما قبل .. لتصبح أجمل مماهى عليه الان
تحياتى
إرسال تعليق